Saturday, 4 August 2012

പ്രതികരിക്കൂ കേരളം

 (ചിത്രത്തിന് കടപ്പാട് : വിദ്യ വിനോദ്) 




കാട് വെളുപ്പിക്കാന്‍ ഇറങ്ങുന്നവര്‍ക്കെതിരെ പ്രതികരിക്കാന്‍ ആരുമില്ലേ??  വിളപ്പില്‍ശാലയിലെ റോഡുകളെ തിങ്ങി നിറച്ചു, ഒഴിപ്പിക്കാന്‍ വന്നവരെ നിരായുധരാക്കി നിലം പറ്റിച്ച കുറെ പേര്‍ കേരളജനത തന്നെ.. ഈ ഉഷാര്‍ ഈ ഒരുമ, കാടു വെട്ടി തെളിയിക്കാന്‍ ഇറങ്ങിയവര്‍ക്കെതിരെയും പ്രയോഗിക്കൂ.. അട്ടപ്പടിയെ മൊട്ടക്കുന്നാക്കി മാറ്റാന്‍ കച്ച കെട്ടിയിറങ്ങിയിരിക്കുന്ന, ആ സംഘത്തിനെതിരെ ആരെങ്കിലുമൊക്കെ ഒന്നിറങ്ങി വരൂ.. പൈന്‍, ഞാവല്‍, കാട്ടുമാവ് തുടങ്ങിയ മരങ്ങളൊക്കെ മുറിച്ചെടുത്തു ലോറികളില്‍ കുത്തി നിറച്ചു, പട്ടണ ഹൃദയം ലക്ഷ്യമാക്കി ഈ സംഘം നീങ്ങുമ്പോള്‍, ചെക്ക്‌ പോസ്റ്റ്കളില്‍  പ്രത്യേക നിര്‍ദ്ദേശം കിട്ടിയവര്‍ മനസ്സോടെയോ, അല്ലാതെയോ കയ്യുയര്‍ത്തി ഇവരെ യാത്രയാക്കുന്നു.. 
വച്ച് പിടിപ്പിച്ചു വളര്‍ത്തി വലുതാക്കിയെടുക്കാനാകില്ലൊരിക്കലും എന്ന് തറപ്പിച്ചു പറയാനാകുന്ന മുത്തശ്ശന്‍ മരങ്ങളെ നിര്‍ദാക്ഷിണ്യം കട പുഴക്കിയെടുത്തു നടന്നു നീങ്ങുന്ന ഈ രാക്ഷസമാനസര്‍ക്കെതിരെ പ്രതികരിക്കാന്‍ വൈമനസ്യം എന്തിന്‌? 
ഉണരൂ.. 


(ചിത്രത്തിന് കടപ്പാട് : ഗൂഗിള്‍ സെര്‍ച്ച്‌) )

പുലിയറ, കോഴിക്കൂടം, വയലൂര്‍, വെച്ചപ്പതി തുടങ്ങിയ പ്രദേശങ്ങളിലെ ഒട്ടു  മിക്ക മരങ്ങളും മുറിച്ചെടുത്തു കഴിഞ്ഞിരിക്കുന്നു എന്നാണ് ഇന്നത്തെ മാതൃഭൂമി റിപ്പോര്‍ട്ട്‌ ചെയ്തിരിക്കുന്നത്..  
കേരളത്തെ മറ്റൊരു മരുഭൂമിയാക്കാന്‍  നമ്മളും കൂട്ട് നില്‍ക്കയാണോ? പ്രതികരിക്കൂ കേരളം.. പ്രതികരിക്കൂ.. ഉടയാടകള്‍ ആകുന്ന വൃക്ഷലതാദികളെ ഉരിച്ചു മാറ്റി കേരളഭൂമിയെ നഗ്നയാക്കുന്ന കാപാലികര്‍ക്കെതിരെ നമ്മള്‍ പ്രതികരിക്കേണ്ടേ? അതോ വിരല്‍ സൂത്രമുള്ള പുതു പുത്തന്‍ മൊബൈലും, 42 ഇഞ്ച്‌ ടി വിയും, പിന്നെ എയര്‍ കണ്ടിഷനെരിന്റെ ശീതിളിമയും നമ്മളുടെ ബുദ്ധിയെ മരവിപ്പിച്ചോ? 
ഒരിടത്തെ കട്ടിംഗ് പെര്‍മിറ്റ്‌ സ്വന്തമാക്കി മറ്റിടങ്ങളിലെ മരങ്ങള്‍ കൂടി മുറിച്ചു മാറ്റുകയാണ് ഇവര്‍ ചെയ്യുന്നതത്രേ.. 
ഇഷ്ടിക കളങ്ങളിലേക്കും, പ്ലൈവുഡ്ഫാക്ടറികളിലേക്കും എന്ന ലേബലില്‍ ആണ് ഈ കള്ളകളികള്‍ എന്ന് പറയുന്നു.. പക്ഷെ ഇതറിയാവുന്നവര്‍ എന്തെ മൌനം പാലിക്കുന്നു.. സിനിമകളിലെ പോലെയോ അതിലും കുറെ കൂടി മോശമായ രീതിയിലെ ഇവന്മാരൊക്കെ തിരിഞ്ഞടിച്ചാലോ എന്ന് ഭയന്നായിരിക്കും.. സംഗതി വാസ്തവം തന്നെ.. എന്നാലും കുറെ പേര്‍ ഒന്ന് ചേര്‍ന്ന് ഒന്ന് പ്രതികരിച്ചാല്‍ ചിലപ്പോള്‍ ഫലം കണ്ടാലോ.. 
അണ്ണാ ഹസാരെ നടത്തിയ നാടകം പോലെ പട്ടിണി കിടന്നല്ല കേട്ടോ..
 പ്രതികരിച്ചു കൊണ്ട് തന്നെ.. രാഷ്ട്രീയപാര്‍ട്ടികളുടെ പിന്‍ബലമില്ലാതെ.. 

3 comments:

ajith said...

അറബിക്കടലിലെങ്ങനെയാടോ മഴപെയ്യുന്നത്...എന്ന പ്രസിദ്ധമായ ചോദ്യം ഓര്‍മ്മ വരുന്നു

Sreedevi .M. Menon said...

:)

കഥപ്പച്ച said...

ഓണാശംസകള്‍! ബ്ലോഗില്‍ ജോയിന്‍ ചെയ്യുന്നു ...പുതിയ പോസ്റ്റുകള്‍ക്കായി കാത്തിരിക്കുന്നു
.പിന്നെ താങ്കളെപ്പോലെയുള്ളവരുടെ ബ്ലോഗ്‌ രചനകള്‍ വായിച്ചു വായിച്ചു ഈ എളിയ ഞാനും ഒരു ബ്ലോഗ്‌ തുടങ്ങി...കഥകള്‍ മാത്രം കിട്ടുന്ന കഥചരക്കുകട ...(പക്ഷെ ഫ്രീയാണ് ട്ടോ) ...അനുഗ്രഹാശിസുകള്‍ പ്രതീക്ഷിക്കുന്നു..(ക്ഷണിക്കുവാന്‍ വൈകിപ്പോയി എങ്കിലും ഒന്നവിടം വരെ വരണേ ..) :))